بقلم: امجد علی راجاؔ
ادب دی سرزمین تا مختلف زباناں دے باغ ہوندن، اور ہر باغا بچ اصناف دے رنگ برنگے بوٹے، جنہاں تا خوشی دے پھل پھُل بی کھلدن تے دکھاں دے کنڈے بی بےبہا ہوندن۔ انہاں باغاں دے مالیاں کو شاعر، ادیب اور نقاد آخیا جلدے، جڑے انہاں باغاں دی رکھوالی بی کردن تے راحت و تسکین دے پھل بی کھاندن۔
وسائل تا قبضہ کرنا دی خواہش انسان بچ پتھر دے زمانے تو ای چلی آندی اے تے اوئی خواہش کج لوکاں کو عزت و احترام اور شہرت دے مستند وسائل یعنی علم و ادب تا قبضہ کرنا تا مجبور کردی اے۔ کج لوک آپڑیاں صلاحیتاں کو نکھارنا جوگے محنت کردن، استاداں دی شاگردی اختیار کردن، علم سختن، مشق کردن۔ ورے کج لوک جنہاں بچ شاعرانہ اور ادبی صلاحیتاں نیں ہوندیاں یا او آپڑے فن اور ہنر کو نکھارنا جوگے محنت اور مشقت دی راہ اختیار نیں کردے او لوک علم و ادب تا قبضہ کرنا دے راہ ٹْوندے رہندن تا کہ آپڑے پْجے ترٹے دے فن کو ادب دا معیار مقرر کر کے اس سلطنت دے بادشاہ بنڑ ہکن۔
کوئی پکھیروں بنڑ کے ادب دے باغاں بچ اڈاریاں ماردے پھردن تے بٹھاں کْیردے رْیندن۔ کوئی حشرات السخن چھپ کے اندر بْڑ جلدن تے کوئی ادبی درندے کھلم کھلا اندر آ بڑدن۔ کوئی نظم دے ڈْالیاں نال پہلچدن تے کوئی نثر دیاں ٹینڑیاں نال لمک جلدن۔ آپڑی ادبی حاکمیت کو یقینی بنڑانڑاں جوگے ادبی گروپ بی بنڑا کیندن۔
اساں دی دنیا بچ ملخ، قوم، برادری، پیشہ یا دلچسپی دی بنیاد تا گروپ بنڑدن ورے ادبی گروپ کھوتے کْوڑے دا فرق پْول کے بنڑائے جلدن۔
ایویں تے دنیا دے ہر ادب دا پْار چانڑاں آلے شاعر اور ادیب ہوندن ورے ہندکو ادب بچ کئی ادھ راہِ شاعر اور ادیب بانواں کُڑنج کے گنتی دے شاعراں اور ادیباں کو ٹھْیلے ماردے ہوئے اگاں بْد دے جلدن، او بی ہندکو ادب کو چار مونڈے لانڑا جوگے۔
شاعری دیاں کتاباں دیخو تے تھوک دے حسابا تا چھپی دیاں ہن۔ اللہ پْلا کرے، کدے گنتی دے کج نثرنگار نہ ہوون آں تے شاعری دیاں کتاباں دی تعداد دیخ کے لگے آ کہ ہندکو ادب بچ شاعری دے علاوہ کوئی اْور صنف اْے ای نیں۔ اور شاعری دیاں کتاباں دا اے حال اْے کہ اکثر کتاباں بچ سارا کج ہوندے، سوائے شاعری دے۔
شاعری دیاں اصناف نالو شاعراں دیاں بی مچ سریاں قِسماں ہوندیاں ہن۔ جنہاں بچو چند ایک دا تعارف کرالنا ضروری اے۔
*چن ماما شاعر*
انہاں شاعراں دی کھُری زمیں تا نیں ٹکدی اس کیتے اے شاعر ہمیشہ چن اتا جُل کے شاعری کردن۔ تَیاں انہاں دی شاعری بچ وزن ذرا کْٹ ای ہوندے۔
*قافیہ اندوز شاعر*
انہاں شعراء دے کلام دی عظمت اے ہوندی اْے کہ اے شاعری کرنا دی بجائے دوئے شاعراں دی آسانی جوگے صرف قافیے کْٹھے کردے ریندن، او بی زورا نال۔ انہاں کو “قافیائی شعراء” بی آخیا جلدے۔
*دو لختی شاعر*
بنیادی طور تا اے شاعر شعر نیں آختے بلکہ مصرعے آختن، تے فر مصرعیاں دے جوڑے بنڑا کیندن۔ انہاں دی شاعری دی خوف صورتی اے ہوندی اْے کہ پہلا مصرعہ دوئے مصرعے نال اتنا ای اوپرہ ہوندے جتنا سیاستداناں دی کارکردگی انہاں دے بیان نال۔
*شتر گُربہ شاعر*
انہاں شاعراں کو شاعری دی وجہ تو شتر گُربہ شاعر نیں آخیا جلدا بلکہ انہاں دیاں چولاں دی وجہ تو آخیا جلدے۔ موآں تا تُسی تُسی کردن تے پراں ہوندیاں نال ای تُو تُو تا آ جلدن۔
*خلائی شاعر*
انہاں دی شاعری خلاء بچ معلق ریندی اے، نہ کسی پاسے لگدی اے تے نہ سمجھ آندی اے۔
*مجموعاتی شاعر*
اے شاعر مالی طور تا تکڑے ہوندن تے پیسے خرچ کر کے کتاباں چھاپ کہندن۔ انہاں دے مجموعہ کلام دا حسن اے ہوندے کہ ٹْونڈ ٹْونڈ کے مر جلسو ورے ناں آسطے بی شاعری نہ تھاسی۔
*گولی شاعر*
اے شاعر اکثر مشاعریاں بچ پائے جلدن اور صرف آپڑا کلام سنڑانڑاں تک ای پائے جلدن۔ کلام سنڑانڑاں تو بعد گولی ہو جلدن۔
*روندُو شاعر*
اے حالات دے مارے دے شاعر ہوندن۔ بےروزگاری، غربت، محبوب دی بےوفائی تا روندے ای ریندن۔ انہاں دی محبوبہ ہر کلام بچ کسی نال نس جلدی اے۔
*کُکڑ شاعر*
اے شاعراں دی او قسم ہوندی اے جڑے سوشل میڈیا اور مشاعریاں بچ بِٹھاں کردے پھردن۔ اور اس تو بعد کُڑک کُڑک کرکے داد دی فرمائش بی کردن۔
*بغضی شاعر*
اے او شاعر ہوندن جڑے اچھے تو اچھا کلام سنڑ کے بی داد نیں دیندے۔ سوشل میڈیا تا کوئی کلام پڑھ کے لائیک دا بٹنڑ نیں دباندے۔ تے اچھے شعراء دے بارے بچ اْیک ای گل آختن، “اس کو شاعری دا کے پتہ اے”.
*نا من شاعر*
اے شاعر کسی دی نیں مندے۔ ہندکو دے گروپاں بچ ہندکو دے علاوہ ہر زبان دی شاعری پوسٹ کردے ریندن۔ ڈکو تے خفا ہوجلدن۔ تسی لکھ دلائل دے چھڑو کہ “خیر” اور “تیر” ہم قافیہ نیں ہوندے ورے اے نیں مندے۔
*ہٹ دھرم شاعر*
اے شاعر نا من شاعر ای ہوندن ورے انہاں بچ اْیک اضافی خوبی ہوندی اْے کہ انہاں دا کاگ چٹا ہوندے۔
*چْاتی مار شاعر*
اے شاعر اکثر وٹس ایپ دے گروپان بچ پائے جلدن۔ گروپ کھولدن، ساریاں پوسٹاں تا چْاتی مار کے غیب ہو جلدن۔
*ہومیوپیتھک شاعر*
ہومیوپیتھک دا ناں سنڑ کے انہاں کو ڈاکٹر سمجھڑاں دی غلطی نیں کرنی۔ اے شاعر بالکل بے ضرر ہوندن، انہاں دا کوئی سائیڈ ایفیکٹ نیں ہوندا۔ انہاں دے ہونڑاں یا نہ ہونڑاں نال شاعری تا کوئی اثر نہیں پیندا۔
*رعب جھاڑ شاعر*
اے شاعر کج ادبی اصطلاحات رٹ کْیندن تے جا بے جا آپڑے علم دا رعب جھاڑ دے ریندن۔ جس دا فائدہ اے ہوندے کہ انہاں دا کلام پاویں سمجھا بچ نہ آوے فر بی لوک آپڑی سمجھا کو کْٹ من کْیندن ورے کلام دی عظمت تا حرف نیں آنڑا دیندے۔
*جماندرو شاعر*
کم عقل لوک انہاں کو “بے پِیرا” شاعر بی آختن،
ورے لوکاں کو کے پتہ کہ اے شاعر شاعری سخ کے جمدن، انہاں کو استاد دی لوڑ ہوندی اْے تے نہ اصلاح دی۔
*حاجی و مُلاں شاعر*
اے شاعر داد و تحسین دا وٹہ سٹہ کردے نظر آندن۔ صرف انہاں شاعراں کو داد دیندن جڑے انہاں کو داد دیون۔ “من ترا حاجی بگویم، تو مرا ملا بگو” دی مصداق۔
*مت رنم شاعر*
اے شاعر یا تے کسی مترنم شاعر تو متاثر ہوندن یا اس دی خارو بچ مترنم کلام پڑھنا دی ناکام کوشش بچ لگے ریندن۔ کلام پاویں معذور ہوسی ورے اے آپڑے ترنم دیاں بیساکھیاں پکڑال کے کلام کو ٹور کھڑدن۔ ادبی وعوامی حلقیاں بچ انہاں کو “بےسُرے” بی آخیا جلدے۔
*آزاد شاعر*
اے شاعر مادرو پدرو آزاد ہوندن، معذرت چاہنداں، انہاں شاعراں دی شاعری مادرو پدرو آزاد ہوندی اے۔ بحر تے چھوڑو اے قافیہ ردیف تو بی آزاد ہوندن۔ اْے اس گلا کو منڑاں آسطے تیار ای نینھ کہ نثر اور نظم بچ بنیادی فرق بحر دا ہوندے۔
*گھرانے والے شاعر*
انہاں دا شاعری نال کوئی تعلق نہیں ہوندا۔ خاندان بچ کوئی اْیک آدھ شاعر ہوندے تے اس دی وراثت تا قبضہ کرکے آپا کو شاعر اخالدن اور لوک انہاں دے بزرگ شاعر دے احترام بچ انہاں کو بی شاعر من کیندن۔
*زُلصوفی شاعر*
انہاں شعراء دا تصوف اور معرفت نال کوئی تعلق نہیں ہوندا، بس زلفاں تے داڑھی رخڑاں دی وجہ تو زلصوفی شاعر اخالدن۔
*مطلق العنان شاعر*
اے شاعر آپڑے علاوہ کسی کو شاعر نیں مندے۔ انہاں دا وس چلے تے میر تقی میر اور مرزا غالب کو بی منڑاں آسطے تیار نہ ہوون۔
*استاد شاعر*
اے شاعر شاعری دے استاد نیں ہوندے، سکولاں دے استاد ہوندن۔ استاد شعراء دے کلام دی تشریح کردیاں کردیاں انہاں کو لگدے کہ اسی بی استاد شاعر ہوگئے آں۔ کج اچھے شاعر بی بنڑ جلدن ورے آٹے بچ لُونڑا دے برابر۔
*زوری دے شاعر*
اے شاعر کسی کو استاد نیں مندے، تے نہ انہاں کو کوئی شاعر مندے، ورے فر بی زورا نال شاعر بنڑے دے ہوندن۔
*پرسنگی شاعر*
اے شاعر اکثر اٹھارویں گریڈ یا اس تو اُتا دے شاعر ہوندن۔ سیاست نال گہرا تعلق ہوندے یا بیوروکریسی نال یاری رشتے داری ہوندی اے۔ تعلقات اور عہدے دی پرسنگ لا کے باقی شاعراں کولو اُچے ہو جلدن۔ انہاں دی بیٹھک بچ کتاباں کولو زیادہ اعزازات، اسناد، شیلڈز، میڈلز اور تمغے پائے جلدن۔
*اسلامی شاعر*
اے شاعر شاعری تا ظلم کرنا آلے نام نہاد شعراء کو نہ زبان نال ڈکدن تے نہ مُوآں نال، صرف دلا بچ برا آختن۔ اے شعراء اسلام دے تریئے درجے تا ہوندن۔
*کْنگڑیاں خور شاعر*
اے شاعر ادب نال ہونڑا آلی ہر زیادتی دے چشم دید گواہ ہوندن، شاعری دے سارے چوراں، ڈاکوآں، لٹیریاں کو چنگی طراں سیانڑدن ورے فر بی موآں بچ کنگڑیاں پْا کے بیٹھے ریندن۔
*بیوروکریٹک شاعر*
انہاں دے بارے بچ مشہور اے کہ “اے افسراں بچ شاعر تے شاعراں بچ افسر ہوندن”. اصل بچ اے شاعر ہوندے ای نینھ، ورے انہاں بغیر مشاعرے بی نیں ہوندے۔ ہمت اْے تے کر کے دسو۔
ادبی گروپ کدے شاعری پیش کرنا جوگے کلام نال اس دی بحر یا کم از کم اس دے ارکان دی نمائش کو لازمی کر چھڑن تے مڑا خیال اے سٹھ تو ستر فی سیکڑہ شاعر کلام پیش کرنا چھوڑ دیسن۔ ددھا دا ددھ تے پانڑیاں دا پانڑی ہوجلسی۔
میں شعراء دی کج تھوڑی جی اقسام دا ذکر کیتے، باقی تسی آپ غور کرو تے تساں کو اْور بی مچ سریاں قسماں دے شاعر نظر آسن۔ پتہ تے مک بی اْے ورے ذکر اس آسطے نہ کر ہکدا کہ فر مک مشاعریاں بچ کونڑ بلاسی؟