غیرت دا بیوپار نہ مندا
ظالم دی سرکار نہ مندا

حق سچ تے انصاف نہ ہووے
میں ہیجا دربار نہ مندا

ٹہیٹھے دا انسان قبول اے
ٹہیٹھے دا کردار نہ مندا

سِر دی بازی لا، تاں منساں
ایویں تے سَردار نہ مندا

بڈہا سوچ، تے بڈہی گل کر
میں سُکا بڈہیار نہ مندا

جس کولو ڈردی اے دنیا
اس کو عزت دار نہ مندا

مفلس دا احساس نیں جس کو
منصب دا حقدار نہ مندا

جس کو پوآلو اس تا پوری
پٹکی کو دستار نہ مندا

بحث نتیجہ خیز نہ ہووے
میں ہیجی تکرار نہ مندا

جس بچ شامل ہوون شرطاں
اس کو تے میں پیار نہ مندا

ہر گل بول کے دسڑاں پیوے
اس کو تے میں یار نہ مندا

حق دی جنگ بچ کلہاں راجاؔ
مر جلساں پر ہار نہ مندا

شاعر: امجد علی راجاؔ