“ہزاریوال”

پیار محبت دولت اسدی، دل اے مالا مال
جیبے خالی ہوون بی دل ہوندے نیں کنگال
عزت، غیرت دے رکھوالے، ہوندے آں لجپال
دنیا تا ایویں تے نیں مشہور ہزاریوال

شرم و حیا تے مہر و وفا بچ گُدے دا کردار 
دل لاواں یا لاواں متھا، رخدے آں معیار
ہتھ پکڑاں تے ٹردے آں فر قبرا تاڑوں نال
دنیا تا ایویں تے نیں مشہور ہزاریوال

حقا تا جد کھلدے آں تے کھلدے آں فر ڈٹ کے
سَچی گَل تُو پھردے ناں سِر ٹَیوے پاویں کَٹ کے
ادھے راہ بچ سٹدے ناں فر، چاہندے آں جد وہال
دنیا تا ایویں تے نیں مشہور ہزاریوال

دنیا پاویں دشمنڑ ہووے پھردے ناں گل کر کے
موت تے اک واری آنڑی اے فر کی جیواں ڈر کے
دشمنڑ جوگے خنجر آں تے یاراں دی آں ٹہال
دنیا تا ایویں تے نیں مشہور ہزاریوال

نکیاں نکیاں خوشیاں بی دل کھول کے یار مناواں
سارے سنگی مل کے ماہیئے گاواں، کمہر پاواں
میلا لگیا رہندے، پہریا رئیندا اے پنڈال
دنیا تا ایویں تے نیں مشہور ہزاریوال

لوڑ وطن کو پیوے تے جان اپڑی دیواں وار 
آنڑاں والے ویلے جوگے ریندے آں تیار
کوڈی کھیڈاں، گتکے کھیڈاں، کھیڈاں والی بال
دنیا تا ایویں تے نیں مشہور ہزاریوال

امجد علی راجاؔ