ظلمتِ شب کی قسم وحشتِ زنداں کی قسم
رات ڈھلنے کو ہے اب، صبحِ درخشاں کی قسم
ہے جواں زندہ دلی موت کی آغوش میں بھی
شانِ مقتل کی قسم، بسملِ رقصاں کی قسم
سرخ پوشاک بنے گی مری اک دن پرچم
دستِ ظالم سے ہوئے چاک گریباں کی قسم
اہلِ ایمان غلامی نہیں کرتے منظور
درسِ قرآں کی قسم حرمتِ انساں کی قسم
اب کے انصاف نہ پایا تو بغاوت ہوگی
تنگدستی کی قسم حالِ پریشاں کی قسم
ہر زباں شعلہ بیاں ہوگی اگر ظلم رہا
گونج اٹھے گی فضا، شہرِ خموشاں کی قسم
ہم سے ہوگا نہ کبھی مہرووفا کا سودا
بزمِ یاراں کی قسم حرمتِ پیماں کی قسم
سر جھکائیں گے نہ راجاؔ درِ باطل پہ کبھی
ہم نے کھائی ہے غمِ شامِ غریباں کی قسم
امجد علی راجاؔ