ہے دعا مری تجھے عشق ہو کسی بے وفا سے خدا کرے
تجھے سُکھ کبھی نہ نصیب ہو مری طرح تُو بھی جلا کرے

تجھے زندگی کی ہو آرزو، تو یہ زندگی نہ وفا کرے
تجھے موت بھی نہ نصیب ہو، تُو تڑپ تڑپ کے دعا کرے

کبھی رونا چاہے تو درد میں، ترے اشک آنکھ میں خشک ہوں 
جو تُو مسکرانے لگے کبھی تو لہو کا اشک بہا کرے

تری زندگی کٹے آہ میں، تجھے چھوڑ دے کوئی راہ میں 
کرے اعتبار تُو جس پہ بھی وہی تیرے ساتھ دغا کرے

تری بے وفائی کی چھائیاں ترا رنگ و روپ اجاڑ دیں
ترا حسن خاک میں یوں ملے کہ تُو آئینے سے چھپا کرے

تجھے لطف یہ بھی نصیب ہو کہ ہر ایک تیرے قریب ہو
ترے ساتھ وعدے سبھی کریں کوئی ایک بھی نہ وفا کرے

ترے سامنے ترا دل لٹے، تری روح تک بھی لرز اٹھے
مرے ساتھ تُو نے کِیا ہے جو، وہی تیرے ساتھ خدا کرے

امجد علی راجاؔ