مجبوریاں خرید دے، ارمان بیچ دے
انسان ای خرید دے، انسان بیچ دے
مٹی بی بیچ دے کوئی اسمان بیچ دے
جو کج اے جس دے واسطے آسان بیچ دے
تندورچی کہٹا کے وزن نان بیچ دے
دھودی بی خوب صحت دا فقدان بیچ دے
افسر نظر بچا کے جے ایمان بیچ دے
تے وارڈن بھی روڈ تا چالان بیچ دے
نقلی گواہ، چہوٹھ تے بہتان بیچ دے
تکڑا وکیل کورٹ دے فرمان بیچ دے
جاہل اے تے شعور دا فقدان بیچ دے
غیرت دے ناں تا قتل دا رجحان بیچ دے
قاضی اے تے او آپڑا میزان بیچ دے
سستا بی دستیاب اے، دربان بیچ دے
چینل ہر ایک ہو کے جو ہلکان بیچ دے
کوئی شریف تے کوئی کپتان بیچ دے
پھیلا کے چہول قوم دی پہچان بیچ دے
غیرت عوام دی مڑا سلطان بیچ دے
کپ کے قصائی جس طرح حیوان بیچ دے
اعضاء بدن دے اس طرح انسان بیچ دے
دنیا تا خوب موت دا سامان بیچ دے
امریکہ نال کرکے بی اعلان بیچ دے
پنڈت بی دیویاں، کدے بھگوان بیچ دے
ملا حدیث بیچ دے قرآن بیچ دے
ٹکٹ بہشت دے، کوئی حوران بیچ دے
کوئی چرس بی نامِ فقیران بیچ دے
کوئی بلال حبشی دی آذان بیچ دے
کوئی تے کربلا دا بی میدان بیچ دے
کافر نی بیچ دا جو مسلمان بیچ دے
توہم پرست ہو گیا ایمان بیچ دے
تہی دے جہیز واسطے ارمان بیچ دے
بڈھا غریب کہار تے سامان بیچ دے
کرکے گزربسر جوگے نقصان بیچ دے
شاعر بچارہ آپڑا دیوان بیچ دے
فنکار چاہتاں دا خیابان بیچ دے
اتھرو چھپا کے آپڑے، مسکان بیچ دے
پَتر اے نیم دا کہ فر اے پان بیچ دے
راجاؔ تے مثلِ نسخہء ِ لقمان بیچ دے
امجد علی راجاؔ