دفع کرو بحث میں نہ کردا، بس ہیک گل دا جواب منگداں
عوام دے خون تے پسینے دا حاکماں تو حساب منگداں

عوام پہوکھی، ورے انہاں دے اثاثے دیخو ہزار ملین
میں ایجے سارے امین تے صادقین دا احتساب منگداں

اداس چہرے، ٹُھڈاں تا پھولی، بُجھی دیاں نا امید اکھیاں
میں آپڑے بےقصور بچیاں دی عمریاں دا شباب منگداں

بغیر بجلی، بغیر پانڑی، بغیر خوراک تے دوائی
طریقہ جِینڑا دا ہووے جس بچ میں کوئی ہیجی کتاب منگداں

ضرورتاں آپڑے زمانے دی کر کنن پوریاں اے بچے
جدید درسی نظام کولو میں ہیک ایجا نصاب منگداں

نصیب جینڑا تے ہو نی ہکدا، کھسو نہ جینڑا دی آرزو تے
میں کوئی تعبیر تے نہ منگدا، اداس اکھیاں دے خواب منگداں

حکومتِ ظلم دا مخالف بی آں تے کرداں میں سرکشی بی
مکو نہ مظلوم کوئی آخے، میں صرف “باغی” خطاب منگداں

زراعتی، صنعتی، سیاسی، معاشیاتی، یا نظریاتی
کسی بی شعبے دی قوم کولو میں جرأتِ انقلاب منگداں

اساں دی محنت تا پلنا والے، اسی نہ رہساں تے فر کے کرسن
نکا جیا اے سوال راجا، نکا جیا میں جواب منگداں

شاعر: امجد علی راجاؔ