میں ہار گیاں جدکہ ہرانڑاں تے تُو آسیں 
میں پْول گیاں آپ پْلانڑاں تے تُو آسیں

ویلے تا مکو چھوڑ گئیں جان بچا کے
دنیا تو بی اے یار سیانڑاں تے تُو آسیں

کس آس تا مک چھوڑ گئیں کر کے تُو بْانڑے
سجڑاں مڑے جینڑاں دا بی بْانڑاں تے تُو آسیں

مک دس تے سئی میں کڑے پاسے مراں جل کے
دنیا تا مڑا اْیکی ٹھکانڑاں تے تُو آسیں

کیتا مکو برباد فلانڑے تے فلانڑے
مک ہونڑ سمجھ آئی فلانڑاں تے تُو آسیں

پاسے میں پرتتاں مکو نیندر بی نیں آندی
سجڑاں تڑے راجاؔ دا سرہانڑاں تے تُو آسیں

امجد علی راجاؔ