تڑے کرکے گیاں میں رُل، محبت جُل
میں پڑھ کے بے گیاں اج قُل، محبت جُل

نہ دِستی ایں، نہ آندی ایں، نہ ملدی ایں
گیا صبرا دا پہانڈا ڈُل، محبت جُل

محبت کے میں کیتی ہوگیاں لوہکا
گیاں میں پہا ککھاں دے تُل، محبت جُل

میں دل دیواں تے نالے جان بی دیواں
میں اتنا دے نہ ہکتا مُل، محبت جُل

وفا جوگے بڑے نقصان میں کیتے
کدے کرساں نہ فر اے پہُل، محبت جُل

اداسی اے قیامت دی اداسی اے
کہ ہر امید ہوگئی گُل، محبت جُل

میں اِس پاسے تے اے دنیا دوئے پاسے
ورے تد روڑ چھوڑے پُل، محبت جُل

زمانے نال ٹرنا بی ضروری اے
کراں میں بی کرے ہلچُل محبت جُل

بڑا نقصان کیتا پال کے کنڈے
ریا نہ ہیک بی ہنڑ پھُل، محبت جُل

کتھا عاشق رئیا کوئی کہ لَؤ ساڑے
دیئے سب ہوگئے ہنڑ گُل، محبت جُل

خدا دا ناں ای کھیڑا چھوڑ راجاؔ دا
محبت جُل محبت جُل محبت جُل

امجد علی راجاؔ