تڑے ظلماں دی کہانڑیں اے، اساں تے واز چانڑیں اے
تُو لکھ آخیں دبانڑیں اے، اساں تے واز چانڑیں اے

اساں دا خون پی جلدیں، اساں دا حق بی کھا جلدیں
تڑی اے پوکھ مکانڑیں اے، اساں تے واز چانڑیں اے

کوئی بولے تے پابندی، کوئی سوچے تے پابندی
اے پابندی ہٹانڑیں اے، اساں تے واز چانڑیں اے

اساں دے راہ بچ تُد چہاڑ چھڑیاں ہن کئی کنداں
تڑی ہر کند ٹہانڑیں اے، اساں تے واز چانڑیں اے

غریباں دی دعائے بد تڑی آکڑ مکاسی جد
تے فر مُکڑیں اے کہانڑیں اے، اساں تے واز چانڑی اے

اسی کمزور جے لوک آں، حقا تا کھل بی نہ ہکدے
ورے جنت کمانڑیں اے، اساں تے واز چانڑیں اے 

حقا تے کھل گیاں راجاؔ نفع نقصان کے دیخاں
اساں تے واز چانڑیں اے، اساں تے واز چانڑیں اے

امجد علی راجاؔ